Hormatly Prezidentimiz Türkmenistanyň Garaşsyzlygynyň 34 ýyllygy mynasybetli dabaralara gatnaşdy

Hormatly Prezidentimiz Türkmenistanyň Garaşsyzlygynyň 34 ýyllygy mynasybetli dabaralara gatnaşdy

27.09.2025

Şu gün ýurdumyzda mukaddes Garaşsyzlygymyzyň 34 ýyllyk baýramy giňden bellenildi. Bu şanly sene döredijilik, öňegidişlik we gülläp ösüş ýoly bilen ynamly öňe barýan Watanymyzyň taryhynda täze bir sahypany açýar.

Hormatly Prezidentimiz Serdar Berdimuhamedowyň 19-njy sentýabrda geçirilen Türkmenistanyň Halk Maslahatynyň mejlisinde eden çykyşynda nygtaýşy ýaly, Garaşsyzlyk ýyllary içinde ýurdumyzda ägirt uly işler durmuşa geçirildi. Ykdysadyýetimiziň ähli ugurlary boýunça düýpli özgertmeler amala aşyryldy. Garaşsyz, hemişelik Bitarap döwletimiziň at-abraýyny belent derejelere ýetiren türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň beýik başlangyçlary, belent tutumlary bilen ata Watanymyz kuwwatly döwlete öwrüldi. Parahatçylygyň we dostlugyň ýurdy, ygtybarly hyzmatdaş hökmünde ýurdumyzyň halkara giňişlikdäki abraýy barha pugtalanýar.

Asylly däbe görä, baş baýramymyz - Türkmenistanyň Garaşsyzlyk güni mynasybetli esasy dabaralar Döwlet münberi toplumynyň öňündäki meýdançada ýaýbaňlandyryldy. Bu ýerde Milli goşunymyzyň harby gullukçylary hatara düzüldiler. Olaryň arasynda ýöriteleşdirilen ýokary okuw mekdepleriniň harby talyplary, harby okuwçylar hem bar.

Sagat - 10:00. Dabaraly pursat ýetip geldi. Hormatly Prezidentimiz Serdar Berdimuhamedow münberiň syn ediş ýerine barýar. Harby we hukuk goraýjy edaralaryň Birleşen harby orkestriniň ýerine ýetirmeginde harby sazlar ýaňlanýar. Ýygnananlar uly ruhubelentlik bilen döwlet Baştutanymyzy mübärekleýärler. Däp bolşy ýaly, baýramçylyk çäresi dabaraly harby ýöriş bilen badalga alýar. Onuň dowamynda Watanymyzyň goranyş kuwwaty, halkymyzyň abadan, parahat durmuşynyň, mukaddes serhetlerimiziň, Garaşsyzlygymyzyň gazananlarynyň goragynda duran merdana harby gullukçylaryň ýokary hünär ussatlygy, ukyp-başarnyklary görkezilýär.

Goranmak ministri, Döwlet howpsuzlyk geňeşiniň sekretary B.Gündogdyýew Türkmenistanyň Prezidenti, ýurdumyzyň Ýaragly Güýçleriniň Belent Serkerdebaşysy goşun generaly Serdar Berdimuhamedowa ýüzlenip, Watanymyzyň Garaşsyzlygynyň şanly 34 ýyllygy mynasybetli dabaraly harby ýörişe başlamaga rugsat bermegini haýyş edýär. Döwlet Baştutanymyz dabara başlamaga rugsat berýär.

Berkarar döwletiň täze eýýamynyň Galkynyşy döwründe hormatly Prezidentimiziň baştutanlygynda ýurdumyzyň hemişelik Bitaraplyk hukuk derejesine esaslanýan, diňe goranyş häsiýetine eýe bolan Harby doktrinasyna laýyklykda, Milli goşunymyzyň goranmak ukybyny pugtalandyrmak, harby we hukuk goraýjy edaralary iň täze tehnikalar bilen üpjün etmek, harby gullukçylaryň gulluk etmegi, ýaşaýyş-durmuşy üçin amatly şertleri döretmek, işgärleriň hünär kämilligini yzygiderli ýokarlandyrmak boýunça möhüm işler durmuşa geçirilýär. Halkara parahatçylyk we ynanyşmak ýylynda-da merdana harby gullukçylar ýurdumyzyň Ýaragly Güýçleriniň hatarlarynda gulluk edip, Harby doktrinada kesgitlenen wezipeleri üstünlikli ýerine ýetirýärler. Olar Watanymyzy goramak boýunça öz borçlaryny ähli zatdan ileri tutup, ýurdumyzyň hem-de halkymyzyň polat galkany, synmaz daýanjy bolup gulluk edýärler. Mukaddes serhetlerimizde parahatçylygy we howpsuzlygy gorap, merdana ata-babalarymyzyň şöhratly ýörelgelerini mynasyp dowam etdirýärler.

Dаbаrаly hаrby ýörişiň sеrkеrdеsi polkownik R.Aýazow goranmak ministri, Döwlet howpsuzlyk geňeşiniň sekretary B.Gündogdyýewe Türkmenistanyň Ýaragly Güýçleriniň şahsy düzüminiň gözden geçirilişe taýýardygy barada hasabat berýär. B.Gündogdyýew hasabaty kabul edip, awtoulagda goşun bölümleriniň öňünden geçip, dabaraly harby ýörişiň düzüm bölümleriniň esgerlerini mübärekleýär.

Soňra Türkmenistanyň Döwlet senasy ýaňlanýar. Baýdak sütüninde Türkmenistanyň Döwlet baýdagy belende galdyrylýar. Döwlet baýdagy Garaşsyzlygymyzy we Bitaraplygymyzy, şöhratly geçmişimizi, ösüşlere beslenýän döwrümizi hem-de beýik geljegimizi alamatlandyrýan gymmatlygymyzdyr. Mukaddes tugumyz türkmen döwletliliginiň mizemez esaslaryny özünde jemläp, halkymyzyň bitewüliginiň, jebisliginiň, parahatçylyk döredijilik, ynsanperwerlik taglymlaryna üýtgewsiz ygrarlylygynyň nyşany bolup parlaýar.

Meýdançada nyzama düzülen serkerdeler, esgerler we harby talyplar Watanymyza, halkymyza, hormatly Prezidentimize wepalylyk baradaky mukaddes kasamy aýdýarlar. Milli goşunymyzyň harby gullukçylary ata-babalarymyzyň watançylyk däplerini mynasyp dowam etdirip, mukaddes borja wepalydyklaryny iş ýüzünde tassyklaýarlar. Däp bolşy ýaly, baýramçylyk ýörişini baýdak göterijiler topary açýar. Olar dabaraly ýörişiň owazy astynda Türkmenistanyň Döwlet baýdagyny hem-de ýurdumyzyň Ýaragly Güýçleriniň goşun görnüşleriniň söweşjeň baýdaklaryny göterip, münberiň öňünden ynamly gadamlar bilen geçýärler.

Soňra münberiň öňünden Türkmenistanyň Goranmak ministrliginiň Berdimuhamet Annaýew adyndaky Ýöriteleşdirilen harby mekdebiniň harby okuwçylary sazlaşykly gadam urup geçýärler. Ýurdumyzyň ýaş harby gullukçylary, goşunlaryň ähli görnüşleriniň şahsy düzümi häzirki ýaşlar üçin hakyky watançylygyň nusgasy bolup hyzmat edýän gaýduwsyz esger, döwlet Baştutanymyzyň garry atasy Berdimuhamet Annaýewiň nusgalyk işlerinden mertlik göreldesini alýarlar.

Ata-babalarymyzyň parasatly ýörelgeleri esasynda ýaş nesli ýokary watançylyk, wepalylyk, Watanyň we halkyň geljegi üçin jogapkärçilik ruhunda terbiýelemek, ýaşlaryň sazlaşykly ösüşi üçin ähli zerur şertleri döretmek, olaryň häzirki zaman bilimlerini ele almaklary bilen bagly meseleler Garaşsyz, baky Bitarap Watanymyzyň döwlet syýasatynyň ileri tutulýan ugurlarydyr. Häzirki döwürde hormatly Prezidentimiziň baştutanlygynda Ýaragly Güýçlerimiziň maddy-enjamlaýyn binýadyny döwrebaplaşdyrmak boýunça durmuşa geçirilýän toplumlaýyn çäreler hem şu maksatlara gönükdirilendir. Geçen ýyl Bilimler we talyp ýaşlar gününde hormatly Prezidentimiziň gatnaşmagynda Türkmenistanyň Goranmak ministrliginiň Berdimuhamet Annaýew adyndaky Ýöriteleşdirilen harby mekdebiniň dabaraly açylmagy-da munuň şeýlediginiň aýdyň mysalydyr.

Soňra münberiň öňünden zenan harby gullukçylar batly gadam urup geçdiler. Olar öz ykbalyny ata Watanyň, ene topragyň goragy bilen berk baglanyşdyryp, ýurdumyzyň harby we hukuk goraýjy edaralarynda Watanymyza, halkymyza, hormatly Prezidentimize ak ýürekden gulluk edýärler. Olaryň yzysüre Ýaragly Güýçlerimiziň hatarynda gulluk edýän serkerdeler batalýony - harby we raýatlyk borjuny abraý bilen ýerine ýetirýän söweşjeň taýýarlygyň ussatlary geçýärler. Şolaryň hatarynda Milli goşunyň, Döwlet gümrük gullugynyň, Döwlet migrasiýa gullugynyň harby gullukçylary bar.

Garaşsyzlyk ýyllarynda ýurdumyzda bitewi harby bilim ulgamy döredildi. Onuň esasy wezipesi häzirki zaman tehnikalarynydyr enjamlaryny dolandyrmagyň başarnyklaryny ele alýan serkerdeleriň ýaş neslini kemala getirmekden ybaratdyr. Türkmenistanyň Goranmak ministrliginiň Harby institutynyň, Harby-deňiz institutynyň alyp barýan işleri hem öňde goýlan şol maksada ýetmäge gönükdirilendir. Bu harby ýokary okuw mekdepleriniň talyplary-da meýdançadan nyzamly ädimler bilen geçýärler. Olardan soňra Içeri işler ministrliginiň institutynyň, Milli howpsuzlyk institutynyň, Serhet institutynyň talyplary münberiň öňünden sazlaşykly ýöräp geçýärler. Beýleki ýokary okuw mekdeplerinde bolşy ýaly, bu institutlarda hem okuw-terbiýeçilik işleri häzirki döwrüň talaplaryna doly laýyk gelýär.

Motoatyjylar batalýonynyň esgerleri-de ajaýyp taýýarlygyň we ýokary ussatlygyň nusgasyny görkezmek bilen, Watanymyzyň parahatçylygynyň, abadançylygynyň üpjün edilmegine uly goşant goşýarlar. Olaryň yzy bilen ýurdumyzyň Harby-howa güýçleriniň uçarmanlary dabaraly harby ýörişi dowam etdirýärler. Türkmen uçarmanlary Watanymyzyň asuda asmanyny ygtybarly goraýarlar. Soňra meýdançadan tankçylar batalýony geçýär. Olar häzirki zamanyň kuwwatly tanklaryny dolandyrmaga ussatlarça erk edýärler. Artilleriýa we asmana atyjylar diwizionlarynyň harby gullukçylary, deňiz-pyýada batalýony hem şu gezekki gözden geçirilişe gatnaşdy. Olar nyzamly ädimler bilen mertligiň, başarjaňlygyň, ýokary hünär ussatlygynyň belent nusgasyny görkezýärler.

Dabaraly harby ýöriş Türkmenistanyň Goranmak, Içeri işler we Milli howpsuzlyk ministrlikleriniň hem-de Türkmenistanyň Döwlet serhet gullugynyň «Türkmen edermen» ýörite maksatly batalýonlarynyň hatary bilen dowam edýär. Bu bölümiň harby gullukçylarynyň tapawutly aýratynlygy söweşjeň, nazary we beden taýýarlygynyň ýokary derejesinden, batyrlykdan, aýgytlylykdan ybaratdyr. Olaryň nyzamly hatary, ynamly ädimleri, ýokary söweşjeň ruhy Watan goragynyň ynamly gollardadygyny aýdyň görkezýär.

Ýurdumyzyň harby we hukuk goraýjy edaralarynyň atly bölümleriniň baýramçylyk ýörişi dabaranyň aýratyn bezegine öwrüldi. Türkmen halkynyň buýsanjy hem şöhraty bolan, ady rowaýata öwrülen ganatly bedewler täze taryhy döwürde döredijiligiň we ösüşiň täze belentliklerine tarap öňe ymtylyşyň aýdyň nyşany bolup durýar. Köp asyrlaryň dowamynda ahalteke bedewleri gaýduwsyz ýigitlerimiziň wepaly ýoldaşy, baýramçylyklarda olaryň ýakyn dostlary bolupdyr. Gadym döwürlerde bolşy ýaly, häzirki wagtda-da behişdi bedewler Watan goragçylarynyň, hukuk tertibiniň goragynda duranlaryň ygtybarly kömekçileridir.

Soňky ýyllarda ýurdumyzyň harby we hukuk goraýjy edaralaryna gelip gowşan häzirki zaman harby tehnikalarynyň gözden geçirilişi Ýaragly Güýçlerimiziň goranyş ukybynyň ýokary derejesini, söweşjeň taýýarlygyny görkezýär. Döwlet münberiniň meýdançasynda gurnalan ýörite ekran arkaly çärä gatnaşyjylar göni ýaýlymda Hazar deňzinde geçirilýän deňiz flotunyň baýramçylyk ýörişine tomaşa etdiler.

Harby-deňiz güýçlerine gelip gowşan, iň kämil ýaraglar bilen enjamlaşdyrylan «Deňiz han» korwet söweşjeň gämisi baýramçylyk gözden geçirilişini açýar. Bu kuwwatly gämi deňziň üstündäki we astyndaky, howadaky hem-de gury ýerdäki nyşanalary ýok etmäge ukyplydyr. Onuň yzy bilen «Edermen», «Gaýratly» raketa gämileri dabaraly ýüzüşi dowam edýär. Olar ýurdumyzyň deňiz serhetleriniň howpsuzlygyny üpjün edýär.

Soňra gezek Milli goşunymyzyň düzüminde duran döwrebap harby tehnikalara ýetýär. Meýdançadan dürli kysymly goşunlaryň mehanizirlenen hatary geçip başlaýar. Dabaraly harby ýörişiň öňüni «INKAS TITAN-DS APS» kysymly sowutlanan harby awtoulag çekýär. Onuň ýöriş hatary bilen «DAGOR» kysymly harby awtoulaglarda Watan goragçylary öz wepaly ýoldaşy bolan türkmen alabaýlary bilen geçýärler. Harby tehnikalaryň gözden geçirilişi «Land Rover» kysymly harby maksatly ýeňil awtoulaglar, «NIMR», «Al SHIBL2» kysymly sowutlanan awtoulaglar, «KIA KLTV-181» kysymly sowutlanan, köpmaksatly söweşjeň harby awtoulaglar bilen dowam edýär. «Türkmen edermen» ýörite maksatly toparlar bu awtoulaglar bilen sazlaşykly hereket edip, öňde goýlan wezipeleri üstünlikli çözýärler. Onuň yzy bilen «Türkmen edermen» ýörite maksatly bölümleriň «INKAS TITAN-DS APS» we «ВМС KIRPI MRAP» kysymly sowutlanan harby awtoulaglary dabara meýdançasyndan geçýär. Bu awtoulaglar pulemýotlary, göçme asmana atyjy raketa toplumlaryny özünde jemleýär.

Ikinji mehanizirlenen kerweniň öňüni «Tayfun» kysymly köpmaksatly sowutlanan harby awtoulag çekýär. Onuň yzy bilen «T-90S» tanklary, “BMP-3” kysymly pyýada goşunyň sowutlanan tehnikalary geçýär. Ýurdumyzda üstünlikli durmuşa geçirilýän harby özgertmeleriň netijesinde raketa we artilleriýa goşunlary öňdebaryjy tehnikalar bilen üpjün edilip, yzygiderli döwrebaplaşdyrylýar. Munuň mysaly hökmünde bu goşun bölümlerinde ulanylýan artilleriýa goşunlarynyň «2S-1 Gwozdika» kysymly özi hereket edýän söweş tehnikalaryny görkezmek bolar. Şol tehnikalar hem dabaraly harby ýörişde münberiň öňünden geçýär.

Meýdança üçünji kerweniň tehnikalary çykýar. Olaryň başyny «Al SHIBL2» kysymly ýeňil sowutlanan harby awtoulag çekýär. Onuň yzy bilen «MERCEDES-BENZ ATEGO» kysymly awtoulagda «Baýraktar TB2» kysymly söweşjeň uçarmansyz uçýan enjam, «MAN TGM» kysymly awtoulagda «Falko» kysymly uçarmansyz uçýan enjam Döwlet münberiniň öňünden geçýär. Garaşsyzlygymyzyň şanly 34 ýyllygy mynasybetli guralýan dabaraly harby ýörişe «SKY STRIKER» kysymly söweşjeň uçarmansyz uçýan enjam, «ORBITER - 2B» we «СW-15D» kysymly uçarmansyz uçýan enjamlar hem gatnaşýar. Olar uly aralyklara taktiki nokatlaýyn urgulary geçirmek üçin niýetlenendir.

Soňra meýdançadan «MAN» kysymly awtoulagyň binýadyna ýörite dolandyryş ulgamy ornaşdyrylan Türkmenistanyň Döwlet migrasiýa gullugyna degişli awtoulag geçýär. Ol meýdan şertlerinde migrasiýa işini ýerine ýetirmek üçin niýetlenendir. Şeýle hem dabara gatnaşyjylara ýurdumyzyň howa giňişliginiň ygtybarly goragyny üpjün edýän «KS-1A», «FD-2000», «FM-90» kysymly iň kämil asmana atyjy raketa toplumlary görkezilýär.

Dabaraly harby ýörişde dördünji mehanizirlenen kerweniň çäklerinde Türkmenistanyň Döwlet serhet gullugynyň harby awtoulaglary geçip başlaýar. Soňra meýdançadan Döwlet serhet gullugynyň “KIA KLTV 141” kysymly sowutlanan söweşjeň awtoulaglary hem-de “Motowezdehod” kysymly häzirki zaman motoulaglary geçýär. Münberiň öňünden üstünde merdana serhetçiler, olaryň wepaly ýoldaşy bolan türkmen alabaýlary oturan “Toyota Hilux” awtoulaglary geçýär. Olaryň yzy bilen «KIA KLTV 141», «Cobra» kysymly köpmaksatly, sowutlanan söweşjeň awtoulaglar barýar. Bu ulag serişdeleri Watanymyzyň mukaddes serhetlerini goramakda netijeli ulanylýar. Dabaraly harby ýörişden Serhet goşunlarynyň «Mantra» kysymly awtoulagynda 120 mm kalibrli minomýotlar, «ВМС KIRPI MRAP» kysymly sowutlanan harby awtoulaglar geçýär. Ýörişi “IVECO” awtoulaglary dowam edýär. Olaryň binýadynda pesden uçýan howa nyşanlaryny ýok etmek üçin niýetlenen “ZU-23” kysymly asmana atyjy raketa toplumlary, «Simbat» raketa uçurma ulgamy, “Orbiter 2B” kysymly uçarmansyz uçýan enjamlar ýerleşdirilendir.

Soňra Döwlet serhet gullugynyň harby gullukçylary «HONDA» kysymly motoulaglarda Watanymyzyň Garaşsyzlygynyň şanly toýunyň hormatyna «34» ýazgyny emele getirip geçýärler. Dabaraly harby ýörişiň bäşinji mehanizirlenen kerweniniň öňüni Türkmenistanyň Milli howpsuzlyk ministrliginiň düzümindäki «IVECO M65» kysymly söweşjeň awtoulag çekýär. Kerweni «Storm-Rider», «LAZAR III» kysymly häzirki zaman sowutlanan söweşjeň awtoulaglar dowam edýär. Altynjy mehanizirlenen kerweniň çäklerinde Türkmenistanyň Içeri işler edaralarynyň ýöriteleşdirilen tehnikalary geçip başlaýar. Kerweniň öňüni «INKAS TITAN-DS APS» kysymly sowutlanan söweşjeň awtoulag çekýär. Onuň yzy bilen «FORD HENNESSEY» awtoulaglary geçýär. Soňra meýdançada Içeri işler ministrliginiň «FORD ATLAS 150», «Toyota Tundra», «GMS Sierra», «PMV-SURVIVOR II», «INKAS TITAN-DS APS» kysymly sowutlanan söweşjeň awtoulaglar peýda bolýar. Bu döwrebap awtoulaglar ýurdumyzyň asudalygynyň hem-de abadançylygynyň, hukuk we jemgyýetçilik tertibiniň üpjün edilmeginde aýratyn ähmiýete eýedir.

Türkmenistanyň Garaşsyzlyk baýramy mynasybetli geçirilýän dabaraly harby ýöriş howa giňişliginde dowam edýär. Howadaky dabaraly ýörişi «Mi-17W-5» kysymly dikuçarlar açýar. Olar guryýer goşunlarynyň söweş hereketlerini howadan goldamak, goşunlary, harby tehnikalary daşamak üçin niýetlenendir. Içeri işler ministrliginiň «Eurocopter-145», Milli howpsuzlyk ministrliginiň «Eurocopter-365» kysymly dikuçarlary asman giňişliginde harby ýörişi dowam edýär. Bu dikuçarlaryň her biri ýokary söweşjeň häsiýetleri bilen tapawutlanýar. Soňra asmandan Döwlet serhet gullugynyň «Agusta-109», «Agusta-139» kysymly häzirki zaman dikuçarlary uçup geçýär.

Baýramçylyk harby gözden geçirilişine «A-29 Super Tucano» kysymly söweşjeň uçarlar hem gatnaşýar. Bu ýeňil zabt ediji söweşjeň uçarlar Harby-howa güýçleri üçin uçarmanlary taýýarlamak, daglyk we çöllük ýerlerde ýeňil sowutlanan tehnikalary hatardan çykarmak, serhet ýakalarynda howadan gözegçilik we aňtaw işlerini amala aşyrmak üçin niýetlenendir. Olaryň yzy bilen Türkmenistanyň Ýaragly Güýçleriniň Harby-howa güýçleriniň «Su-25», «Mig 29» kysymly söweşjeň uçarlary geçýär. Türkmen uçarmanlary söweşjeň uçarlary we dikuçarlary ussatlyk bilen dolandyryp, ýokary hünär derejelerini görkezýärler.

Şu gün görkezilen kämil harby howa tehnikalarynyň hatarynda islendik howa şertlerinde, dürli belentliklerde, guryýer ýa-da deňiz çäklerinde, daglyk ýerlerde uçmaga ukyply «M-346» kysymly uçarlar-da bar. Harby-howa güýçleriniň öňünde duran wezipeleri ýerine ýetirmek üçin ähli zerur enjamlar bilen enjamlaşdyrylan bu tehnikalar howa giňişliklerini goramaga, aňtaw işlerini alyp barmaga, guryýer goşunlarynyň söweşjeň hereketlerini goldamaga niýetlenendir. «С-27J SPARTAN» kysymly harby-ulag uçary, «Su-25» kysymly söweşjeň uçarlar howa giňişligindäki harby ýörişi jemleýär.

Dabaraly harby ýörişde görkezilen döwrebap ýerüsti, deňiz we howa tehnikalary hormatly Prezidentimiziň baştutanlygynda Garaşsyz, hemişelik Bitarap Türkmenistanyň goranyş ukybyny pugtalandyrmak, Ýaragly Güýçlerimizi döwrebaplaşdyrmak, harby we hukuk goraýjy edaralaryň işini mundan beýläk-de kämilleşdirmek meselelerine uly üns berilýändigini nobatdaky gezek subut edýär.

Soňra Döwlet münberiniň öňündäki meýdançada Türkmenistanyň Goranmak ministrliginiň Aýratyn hormat garawuly batalýonynyň harby gullukçylary düzülýärler. Her ýylda geçirilýän dabaraly harby ýörişde bu batalýonyň şahsy düzümi ýokary nyzam emelleri bilen ajaýyp şekilleri döredýärler. Olar şu ýyl hem Türkmenistanyň Garaşsyzlyk gününe baýramçylyk sowgady bilen geldiler. Meýdançada Halkara parahatçylyk we ynanyşmak ýylynyň nyşanynyň hem-de Garaşsyzlyk binasynyň şekilleri emele getirilýär. Soňra meýdançada dabaraly harby ýörişiň ýöriş sazlaryny ýerine ýetiren harby we hukuk goraýjy edaralaryň Birleşen harby orkestri peýda bolýar. Olaryň ýerine ýetirýän sazlarydyr mukamlary Milli goşunymyzyň watançylyk ruhuny belende göterýär. Ýurdumyzyň şanly baýramy mynasybetli ajaýyp sazly sowgady taýýarlan Birleşen harby orkestriň joşgunly çykyşy harby ýörişe aýratyn öwüşgin çaýdy. Olaryň ýerine ýetirmeginde Gahryman Arkadagymyzyň “Türkmenistan - parahatçylygyň we ynanyşmagyň Watany” atly goşgusyna döredilen aýdym dabaraly harby ýörişiň jemlenmesine öwrüldi.

Soňra Türkmenistanyň Garaşsyzlygynyň 34 ýyllygy mynasybetli giň gerimli dabara dowam etdi. Ol döwrebap telekommunikasiýa serişdeleri we aragatnaşyk ulgamlary arkaly göni ýaýlymda köpçülige ýetirildi. Munuň özi watandaşlarymyza hem-de dünýä döwletleriniň ýaşaýjylaryna ýurdumyzyň baş baýramynyň şanyna guralan dabara tomaşa etmäge mümkinçilik berdi.

Bu ýerde milli lybasdaky iki çapyksuwar ajaýyp ahalteke bedewini meýdança çykardylar. Şaý-sepler bilen bezelen at esbaplary behişdi bedewiň gözelligine gözellik goşýar. 2022-nji ýylda doglan Zaman atly akýal mele reňkli bu ajaýyp bedew Gurthatar we Yşgyn diýen atlaryň neslindendir. Ady rowaýata öwrülen Gelşikliniň ugruna degişli bolan bu bedew Türkmenistanyň Garaşsyzlygynyň 34 ýyllygy mynasybetli, türkmen halkynyň bagtyýarlygy, Watanymyzyň mundan beýläk-de gülläp ösmegi ugrunda edýän yzygiderli aladasy üçin tüýs ýürekden hoşallygyň nyşany hökmünde Hökümet agzalarynyň adyndan hormatly Prezidentimiz Serdar Berdimuhamedowa sowgat berildi.

Berkarar döwletiň täze eýýamynyň Galkynyşy döwründe ahalteke bedewi Watanymyzyň gülläp ösüşiň täze belentliklerine tarap okgunly gadamlarynyň, halkymyzyň döredijilik zehininiň, milli mirasymyzyň dowamatlylygynyň ajaýyp nyşanydyr. Bu ajaýyp ahalteke bedewi meýdançada buýsanç bilen gezim edip, dabara gatnaşyjylarda we myhmanlarda ýakymly duýgulary döretdi.

Soňra ellerinde Türkmenistanyň Döwlet baýdagy hem-de BMG-niň baýdagy buýsançly parlaýan türkmen çapyksuwarlarynyň ýörişi başlandy. Halkymyz gadymy döwürlerden bäri behişdi bedewi goç ýigidiň wepaly ýoldaşy, toý-baýramlaryň bezegi hasaplapdyr. Soňra meýdançadan diňe bir ýurdumyzda däl, daşary ýurtlarda-da uly şöhrata eýe bolan “Galkynyş” milli at üstündäki oýunlar topary geçýär. Bu toparyň şu ýylyň başynda Monakonyň Monte-Karlo şäherinde geçirilen halkara sirk sungaty festiwalynda üstünlikli çykyş edip, Altyn baýraga we beýleki ýörite baýraklara mynasyp bolmagy Halkara parahatçylyk we ynanyşmak ýylynyň rowaçlyklarynyň özboluşly başlangyjyna öwrüldi. Çapyksuwarlaryň at üstünde ussatlarça ýerine ýetiren tilsimleri, çylşyrymly akrobatik hereketleri tomaşaçylary ýene bir ýola haýran galdyrdy.

Türkmenistanyň hemişelik Bitaraplygynyň 30 ýyllygynyň BMG-niň döredilmeginiň 80 ýyllygy bilen gabat gelmegi şanly ýylyň ähmiýetini has-da artdyrýar. Şu nukdaýnazardan, ýylyň dowamynda strategik hyzmatdaşlygyň çäklerinde birnäçe halkara forumlar we beýleki çäreler geçirilýär. Awgust aýynda “Awaza” milli syýahatçylyk zolagynda BMG-niň Deňze çykalgasy bolmadyk ösüp barýan döwletler boýunça üçünji maslahaty üstünlikli geçirildi. Ýakynda BMG-niň Baş Assambleýasynyň 80-nji sessiýasynyň ýokary derejeli plenar mejlisinde hormatly Prezidentimiz Serdar Berdimuhamedow sebit we halkara derejede parahatçylygy, durnukly ösüşi üpjün etmäge gönükdirilen birnäçe anyk başlangyçlary öňe sürdi.

Watanymyzyň Garaşsyzlygynyň 34 ýyllygy mynasybetli baýramçylyk ýörişini Türkmenistanyň Halk Maslahatynyň, Mejlisiniň we jemgyýetçilik guramalarynyň wekilleri dowam edýärler. Meýdançadan milli nyşanlar bilen bezelen awtoulag platformasy geçýär. Berkarar döwletiň täze eýýamynyň Galkynyşy döwründe Gahryman Arkadagymyz tarapyndan başy başlanan demokratik özgertmeler hormatly Prezidentimiziň baştutanlygynda mynasyp dowam etdirilýär. Döwrüň talaplaryna, halkara hukugyň umumy ykrar edilen kadalaryna laýyklykda, ýurdumyzyň kanunçylyk-hukuk binýady yzygiderli kämilleşdirilýär. Bu işlerde Türkmenistanyň Halk Maslahatyna, Mejlise we jemgyýetçilik guramalaryna möhüm orun degişlidir. Şunuň bilen baglylykda, ýurdumyzyň Garaşsyzlygyny, hemişelik Bitaraplygyny, halkara parahatçylygy we ynanyşmagy pugtalandyrmakda, Diýarymyzyň syýasy, ykdysady, medeni ugurlarda gazanan üstünliklerine mynasyp goşantlaryny goşan adamlary sylaglamak maksady bilen, hormatly Prezidentimiz «Türkmenistanyň Bitaraplygynyň 30 ýyllygyna» atly Türkmenistanyň ýubileý medalyny döretmek hakynda» Türkmenistanyň Kanunyna gol çekdi.

Garaşsyzlyk baýramynyň öňüsyrasynda paýtagtymyzda Gahryman Arkadagymyzyň başlyklyk etmeginde we döwlet Baştutanymyzyň gatnaşmagynda geçirilen Halk Maslahatynyň mejlisinde «Bitarap Türkmenistanyň parahatçylyk we ynanyşmak syýasatynyň hukuk esaslary hakynda» Türkmenistanyň Konstitusion kanuny kabul edildi. Milli Liderimiziň başlangyjy bilen taýýarlanan bu resminama hemişelik Bitaraplyk derejesiniň ýörelgelerini we ileri tutulýan ugurlaryny kanun esasynda berkidýär. Bu bolsa Türkmenistanyň Bitaraplygynyň 30 ýyllygynyň bellenilýän ýylynda aýratyn ähmiýete eýedir. Bu Kanun ýurdumyzyň sebitleýin durnuklylygyň ygtybarly kepili hökmünde, şeýle hem parahatçylyk dörediji döwlet hökmünde ornuny has-da pugtalandyrmaga, şunda Bitaraplygyň mümkinçiliklerinden netijeli peýdalanmaga gönükdirilendir.

Soňra kanun esasynda döwlet ähmiýetli şäher diýen aýratyn hukuk derejesine eýe bolan Arkadag şäheriniň häkimliginiň baýramçylyk görnüşinde bezelen awtoulag platformasy meýdança çykdy. Mälim bolşy ýaly, täze şäheriň keşbinde milli binagärligiň iň gowy däpleri dizaýnyň öňdebaryjy tejribesi bilen sazlaşykly utgaşýar. Bu täsin şäher dünýäniň şähergurluşyk, inženerçilik-tehniki tejribesiniň innowasion hem-de öňdebaryjy gazananlaryny, adamlaryň ýaşamaklary üçin has amatly şertleri özünde jemleýär. Şäheriň ýokary halkara ölçeglere laýyk gelýändigi köp sanly halkara güwänamalardyr baýraklar bilen tassyklanyldy. Şu ýyl Arkadag şäheriniň ýol-ulag düzümine degişli birnäçe desgalaryň durky düýpli döwrebaplaşdyrylyp, ulanmaga berildi. Ahalteke atlarynyň ösdürilip ýetişdirilen gadymy mekanynda, durky täzelenen “Ahalteke atlary” şaýolunyň ugrunda “Taýçanak” atly ajaýyp bina açyldy. Arkadag şäheriniň iki ýyllygy mynasybetli şäheriň aragatnaşyk we internet ulgamynyň 5G tehnologiýasynyň işine ak pata berildi. Häzirki wagtda durmuş ulgamy dolulygyna öňdebaryjy sanly, maglumat-kommunikasiýa hem-de ekologik taýdan arassa tehnologiýalara esaslanýan ýurdumyzyň ilkinji “akylly” şäheriniň ikinji tapgyrynyň gurluşygy batly depginde alnyp barylýar. Sebitde deňi-taýy bolmadyk döwrebap şäheriň ýaşaýjylarynyň adyndan Gahryman Arkadagymyza, Arkadagly Gahryman Serdarymyza Garaşsyz, baky Bitarap Watanymyzyň Garaşsyzlyk baýramynyň şanyna gutlaglar aýdylýar.

Soňra Aşgabat şäher häkimliginiň paýtagtymyzyň binagärlik nyşanlary bilen bezelen awtoulag platformasy Döwlet münberiniň öňünden geçýär. Şähergurluşyk syýasatynyň üstünlikli durmuşa geçirilmegi bilen, ösüşiň hem-de gözelligiň şäheri hökmünde ak mermerli paýtagtymyzyň dünýädäki at-abraýy barha artýar. Milli binagärligiň iň gowy ýörelgeleri öňdebaryjy gurluşyk tejribesi bilen sazlaşykly utgaşdyrylyp gurulýan dürli maksatly desgalar ýokary durmuş şertlerini üpjün etmek bilen bir hatarda, paýtagtymyzyň täze, döwrebap keşbini emele getirýär. Şol desgalaryň birnäçesi dünýä binagärliginiň ajaýyp täsinligi hökmünde Ginnesiň rekordlar kitabyna girizildi.

Aşgabadyň «Dizaýn» ugry boýunça ÝUNESKO-nyň döredijilik şäherleriniň toruna girizilendigini bellemek gerek. Baş şäherimiz ösen senagatlaşan merkez bolup, durnukly ösüşiň, gaýtalanmajak gözelligiň özboluşly nyşany hökmünde ykrar edilýär. Her ýyl Aşgabadyň ajaýyp binagärlik keşbiniň üsti dürli maksatly täze binalar bilen ýetirilýär. Hormatly Prezidentimiziň gatnaşmagynda paýtagtymyzyň demirgazygyndaky senagat toplumynyň çäginde çüýşe önümlerini öndürýän önümhananyň açylmagy, baş şäherimiziň merkezi bölegindäki seýilgähiň durkunyň täzelenip, ulanmaga berilmegi Watanymyzyň Garaşsyzlyk baýramyna ajaýyp sowgat boldy. Mundan başga-da, Aşgabadyň ýol-ulag düzüminiň maddy-tehniki kuwwatlyklary öňdebaryjy daşary ýurt önüm öndürijilerinden täze satyn alnan 700 sany döwrebap ýolagçy awtobusy bilen has-da berkidildi.

Soňra dabaraly ýöriş ýurdumyzyň bäş welaýatyna wekilçilik edýän awtoulag platformalarynyň toparynyň geçmegi bilen dowam etdi. Suratly pannolarda dünýä belli taryhy binagärlik ýadygärlikleri, häzirki döwrüň iri desgalary, Ahal, Balkan, Daşoguz, Lebap, Mary welaýatlarynyň ajaýyp künjeklerinde ýerleşýän binalaryň şekilleri görkezilýär. Welaýatlaryň döredijilik toparlarynyň çykyşlarynda milli däp-dessurlarymyzyň özboluşlylygy şöhlelenýär. Döwlet maksatnamalarynyň üstünlikli durmuşa geçirilmegi esasynda sebitleriň durmuş-medeni, ykdysady infrastrukturasy yzygiderli döwrebaplaşdyrylýar. Munuň şeýledigine baş baýramyň öňüsyrasynda Diýarymyzyň sebitlerinde dabaraly açylyp ulanmaga berlen döwrebap şäherçedir obalar hem şaýatlyk edýär.

Şu ýylda kabul edilen «Türkmenistanyň Prezidentiniň obalaryň, şäherçeleriň, etraplardaky şäherleriň we etrap merkezleriniň ilatynyň ýaşaýyş-durmuş şertlerini özgertmek boýunça 2028-nji ýyla çenli döwür üçin rejelenen görnüşdäki Milli maksatnamasynda» ýurdumyzyň sebitlerini ösdürmek boýunça mundan beýläk-de toplumlaýyn işleri durmuşa geçirmek göz öňünde tutulýar. Türkmenistanyň Halk Maslahatynyň nobatdaky mejlisinde Ahal, Daşoguz, Lebap, Mary welaýatlarynyň dolandyryş-çäk bölünişigini döwrüň talaplaryna laýyk getirmek, ilatyň ýaşaýyş-durmuş şertlerini has-da gowulandyrmak, döwlet derejesinde kabul edilýän çözgütleriň dessin ýerine ýetirilmegini, Watanymyzyň durmuş-ykdysady taýdan depginli ösmegini üpjün etmek üçin şertleri döretmek maksady bilen, bu welaýatlarda täze etraplar we olaryň häkimlikleri döredildi.

Hormatly Prezidentimizi hem-de dabaranyň köp sanly myhmanlaryny awtoulag platformalarynda barýan ýaşulular, ýaş nesliň wekilleri mübärekleýärler. Joşgunly aýdym-sazlar, asmana uçurylan köpöwüşginli şarlar adamlaryň baýramçylyk ruhuny belende göterýär.

Döwlet münberiniň öňündäki meýdançadan Türkmenistanyň Bedenterbiýe we sport baradaky döwlet komitetiniň baýramçylyk görnüşinde bezelen awtoulagy, köp sanly türgenler geçýärler. Şolaryň hatarynda sportuň dürli görnüşleriniň ussatlary, milli we halkara derejedäki ýaryşlaryň ýeňijileri, olaryň tälimçileri bar. Öňdengörüjilikli döwlet strategiýasynyň esasynda häzirki wagtda milli sport ulgamy hil taýdan täze derejelere çykdy. Türkmenistanda sport bilen meşgullanmak, türgenleriň başarnyklaryny kämilleşdirmek, tälimçileriň, beýleki hünärmenleriň işlemekleri üçin ähli şertler döredilýär. Netijede, türkmen türgenleri dürli abraýly halkara ýaryşlarda üstünlikli çykyş edýärler we baýrakly orunlara mynasyp bolýarlar. Olaryň gazanýan üstünlikleri döwlet derejesinde sarpalanýar. Şu ýyl “Arkadag” futbol topary Aziýanyň Futbol konfederasiýasynyň Çagyryş ligasynyň çempiony boldy. Şu mynasybetli ýaryşda gazanylan pul baýragynyň Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň hasabyna geçirilmegi ýurdumyzda çagalaryň bähbidine ynsanperwer başlangyçlaryň halkymyz tarapyndan giňden goldanylýandygynyň nobatdaky nyşanyna öwrüldi.

Diýarymyzda parahatçylyk söýüjilikli başlangyçlaryň wagyz edilmeginde, dost-doganlyk gatnaşyklarynyň berkidilmeginde sport diplomatiýasynyň mümkinçilikleriniň netijeli ulanylýandygyny hem bellemek gerek. Muny ýurdumyzda halkara derejeli ýaryşlaryň geçirilmeginiň yzygiderli häsiýete eýe bolýandygy-da aýdyň tassyklaýar. Şu ýyl paýtagtymyzda sportuň milli we alyş göreşi boýunça halkara ýaryş, sportuň küşt görnüşi boýunça ýaşajyk türgenleriň arasynda halkara ýaryş guramaçylykly geçirildi.

Soňra Döwlet münberiniň öňünden Bilim ministrliginiň baýramçylyk äheňinde bezelen awtoulaglary, bu ulgamyň wekilleri, ýaş nesiller geçýärler. Gahryman Arkadagymyz tarapyndan başy başlanyp, Arkadagly Gahryman Serdarymyzyň baştutanlygynda durmuşa geçirilýän bilim özgertmeleri bu ulgamy halkara standartlaryň derejesine çykarmaga mümkinçilik döretdi. Bilimiň we ylmyň döwletiň, jemgyýetiň ösüşiniň, döredijilik mümkinçilikleriniň möhüm binýadydygyny nygtamak gerek. Şunuň bilen baglylykda, ylmy we tehnologiýany ösdürmek, ýurdumyzyň aň-paýhas kuwwatyny artdyrmak, giň dünýägaraýyşly, ýokary bilimli ýaş nesilleri terbiýeläp ýetişdirmek, ugurdaş maksatnamalary we konsepsiýalary durmuşa geçirmek, hünärmenleriň taýýarlygyny kämilleşdirmek täze taryhy döwürde Türkmenistanyň döwlet syýasatynyň ileri tutulýan ugurlarynyň biridir.

Her täze okuw ýylyny täze, döwrebap bilim edaralarynyň birnäçesiniň açylyş dabaralary bilen utgaşdyrmak ýurdumyzda asylly däbe öwrüldi. Gahryman Arkadagymyzyň gatnaşmagynda paýtagtymyzda açylyp ulanmaga berlen Halkara senagatçylar we telekeçiler uniwersiteti, Mary şäherindäki Türkmenistanyň Döwlet energetika institutynyň goşmaça okuw we beýleki desgalary, ýurdumyzyň dürli künjeklerinde açylan mekdeplerdir çagalar baglary Watanymyzyň mukaddes Garaşsyzlygynyň 34 ýyllyk baýramynyň öňüsyrasynda ýaş nesiller üçin ajaýyp sowgat boldy. Türkmenistanly mekdep okuwçylarynyň, ýokary okuw mekdepleriniň talyplarynyň abraýly halkara bäsleşiklerde, ders olimpiadalarynda gazanýan üstünlikleri bu ugurda alnyp barylýan işleriň netijeli häsiýete eýe bolýandygyny görkezýär.

Baýramçylyk ýörişini saglygy goraýyş ulgamynyň işgärleri dowam etdirýärler. Halkyň bagtyýar durmuşda ýaşamagy baradaky alada döwlet syýasatynyň baş maksady bolup durýar. Soňky ýyllarda milli saglygy goraýyş ulgamy hil taýdan täze derejä çykdy we raýatlara halkara standartlara laýyk gelýän lukmançylyk hyzmatlarynyň elýeterli bolmagyny üpjün etdi. “Saglyk” Döwlet maksatnamasynyň çäklerinde saglygy goraýyş ulgamyny kämilleşdirmek we oňa degişli desgalary döwrebaplaşdyrmak, ýokary derejeli hünärmenleri taýýarlamak, derman senagatyny ösdürmek maksatlaryna gönükdirilen giň gerimli işler durmuşa geçirilýär. Paýtagtymyzda, welaýatlarda bu ulgama degişli öňdebaryjy ýöriteleşdirilen enjamlar, iň täze tehnologiýalar bilen enjamlaşdyrylan döwrebap desgalar guruldy. Arkadag şäherinde iri lukmançylyk klasteriniň gurlup ulanmaga berilmegi bilen, ýurdumyzyň derman we lukmançylyk enjamlary senagatynyň önümçilik kuwwaty has-da artar. Döwlet Baştutanymyz Türkmenistanyň Halk Maslahatynyň mejlisindäki çykyşynda saglygy goraýyş ulgamyna degişli ýene birnäçe iri taslamalaryň durmuşa geçiriljekdigini nygtady. Şunuň bilen birlikde, şypahana-dynç alyş infrastrukturasy hem giňeldilýär. Daşary ýurtly hyzmatdaşlar bilen işjeň hyzmatdaşlyk edilip, netijeli tejribe alşylýar. “Il saglygy — ýurt baýlygy” şygary astynda amala aşyrylýan köpugurly işler Türkmenistanyň Saglygy goraýyş we derman senagaty ministrliginiň baýramçylyk görnüşinde bezelen platformasynda öz mynasyp beýanyny tapdy.

Soňra baýramçylyk meýdançasyndan Türkmenistanyň Gurluşyk we binagärlik ministrliginiň, Awtomobil ýollarynyň gurluşygyny dolandyrmak baradaky döwlet agentliginiň işgärleri dabaraly ýagdaýda geçýärler. Gurmak we döretmek häzirki wagtda hormatly Prezidentimiz tarapyndan üstünlikli durmuşa geçirilýän döwlet syýasatynyň esasy wezipeleriniň biridir. Muňa ýurdumyzda ýaýbaňlandyrylan täzeçil şähergurluşyk strategiýasy hem şaýatlyk edýär. Onuň üstünlikli durmuşa geçirilmegi bilen, şäherleriň we obalaryň keşbi tanalmaz derejede özgerdi. Iri taslamalaryň amala aşyrylmagy, gurluşyk senagatynyň toplumlaýyn ösdürilmegi düýpli döwlet goldawyna eýedir. Garaşsyzlyk ýyllarynda milli gurluşykçylarymyz tarapyndan bina edilen ajaýyp desgalaryň binagärlik aýratynlyklary, olaryň gurluşygynda peýdalanylýan döwrebap tehnologiýalar innowasion ösüş ýoluna düşen Garaşsyz Watanymyzyň ägirt uly ykdysady we döredijilik kuwwatyna eýedigini subut edýär. Ýurdumyzda bar bolan awtomobil ýollarynyň durky täzelenilýär hem-de täzeleri gurulýar. Häzirki wagtda Aşgabat - Türkmenabat ýokary tizlikli awtomobil ýolunyň Mary - Türkmenabat böleginiň, Garabogazköl aýlagynyň üstünden geçýän awtomobil köprüsiniň gurluşygy alnyp barylýar.

Senagat we gurluşyk önümçiligi ministrliginiň, “Türkmenhimiýa” döwlet konserniniň platformasynda-da ýetilen sepgitler görkezilýär. Senagat we gurluşyk önümçiligi pudagynda senagaty ösdürmäge, daşary ýurtlardan getirilýän harytlaryň ornuny tutýan, eksport ugurly önümleriň önümçiligini ýola goýmaga, innowasion tehnologiýalar bilen enjamlaşdyrylan häzirki zaman kärhanalaryny gurmaga, hereket edýän önümçilik kuwwatlyklaryny artdyrmaga aýratyn ähmiýet berilýär. Ýurdumyzy senagatlaşdyrmak boýunça meýilnamalary durmuşa geçirmegiň çäklerinde senagat infrastrukturasy yzygiderli döwrebaplaşdyrylýar we giňeldilýär. Muňa şu ýyl döwlet Baştutanymyzyň ak pata bermeginde Ahal welaýatynyň Bäherden etrabynda Bäherden keramiki önümler kärhanasynyň dabaraly açylmagy hem şaýatlyk edýär.

Himiýa senagatynda täze önümçilikleri döretmek babatda-da netijeli işler durmuşa geçirilýär. Garaşsyzlyk baýramynyň öňüsyrasynda hormatly Prezidentimiziň gol çeken Karary esasynda Balkan welaýatynyň Türkmenbaşy etrabynda ýylda 1 million 155 müň tonna karbamid öndürýän toplumy gurmak boýunça dünýäniň öňdebaryjy kompaniýalary bilen şertnama baglaşmaga ygtyýar berildi. Häzirki wagtda himiýa senagatynyň işgärleri üçin Türkmenbaşy etrabynyň Guwlymaýak şäherçesinde ýaşaýyş jaýlar we binalar toplumynyň gurluşygy alnyp barylýar. Mundan başga-da, pudagy ösdürmegiň maksatnamasynyň çäklerinde Ahaldaky gazdan benzin öndürýän zawodyň ikinji tapgyryny, Türkmenabat şäherindäki himiýa zawodynyň düzüminde mineral dökünleri öndürýän toplumy, Mary etrabynyň çäginde mineral dökünleri öndürýän zawody gurmak meýilleşdirilýär.

Täze taryhy döwürde elektroenergetika pudagynyň maddy-tehniki binýadyny berkitmek, diňe bir içerki sarp edijileri doly we üznüksiz üpjün etmek bilen çäklenmän, eýsem, elektrik energiýasynyň eksport edilýän möçberini hem yzygiderli artdyrmaga mümkinçilik berýän ygtybarly ugurdaş infrastrukturany döretmek boýunça işler dowam etdirilýär. Pudakda durmuşa geçirilýän ägirt uly işler meýdançadan geçen Energetika ministrliginiň awtoulag platformasynda öz beýanyny tapdy. Ýurdumyzyň sarp edijilerini elektrik energiýasy bilen ygtybarly üpjün etmäge, şol bir wagtda eksport mümkinçiliklerini giňeltmäge şert döredýän kuwwatly elektrik desgalary gurlup ulanmaga berilýär. Ekologik taýdan arassa energiýany, gaýtadan dikeldilýän energiýa çeşmelerini iş ýüzünde peýdalanmak babatda-da yzygiderli işler alnyp barylýar.

Soňra dokma we halyçylyk pudaklarynyň mümkinçilikleri görkezildi. Döwletimiz tarapyndan pudagyň maddy-tehniki binýadyny berkitmäge uly üns berilýär. Bar bolan kärhanalar döwrebaplaşdyrylýar, ýerli çig mal esasynda ýokary hilli önümler öndürýän täze kärhanalar gurulýar. Dokma senagaty işgärleriniň we halyçy gelin-gyzlaryň iş şertlerini mundan beýläk-de gowulandyrmak boýunça ähli zerur çäreler geçirilýär. Dokma senagaty ministrliginiň we “Türkmenhaly” döwlet birleşiginiň awtoulag platformasynda ýurdumyzda hem-de daşary ýurtlarda sarp edijiler tarapyndan uly isleg bildirilýän dürli önümler şöhlelendirilýär.

Meýdança Türkmenistanyň Söwda we daşary ykdysady aragatnaşyklar ministrliginiň, Senagatçylar we telekeçiler birleşmesiniň, Döwlet haryt-çig mal biržasynyň, Söwda-senagat edarasynyň awtoulag platformalary çykýar. Bu düzümleriň alyp barýan işi ýurdumyzyň ykdysady kuwwatyny ýokarlandyrmaga, türkmen önümlerini dünýä bazaryna çykarmaga, daşary ýurtly hyzmatdaşlar bilen özara bähbitli hyzmatdaşlygy pugtalandyrmaga goşant goşýar. Türkmenistanyň döwlet syýasatynyň ileri tutulýan ugurlarynyň biri-de häzirki zaman bazar gatnaşyklary bilen ýokary netijeli ykdysadyýeti döretmekden ybaratdyr. Häzirki wagtda «Türkmenistanda öndürildi» diýen nyşanly harytlara dünýä bazarlarynda uly isleg bildirilýär. Munuň özi hususy pudagy höweslendirmek we goldamak, pudagyň wekilleriniň netijeli iş alyp barmaklary üçin zerur şertleri döretmek boýunça döwletimiz tarapyndan durmuşa geçirilýän giň gerimli işleriň oňyn netijesidir.

Bu günki gün türkmen telekeçileri dürli ugurlarda öndürijilikli zähmet çekýärler, sarp ediş harytlaryny öndürmekde, gurluşyk pudagynda, hyzmatlar ulgamynda ösen tehnologiýalary üstünlikli özleşdirýärler. Kabul edilen döwlet maksatnamalarynyň amala aşyrylmagyna ýardam bermekde, bäsdeşlige ukyply, import edilýän harytlaryň ornuny tutýan, eksporta gönükdirilen önümleri öndürmek, azyk bolçulygyny üpjün etmek boýunça öňde goýlan wezipeleri çözmekde Türkmenistanyň Senagatçylar we telekeçiler birleşmesiniň agzalaryna uly orun degişlidir.

Arkadagly Gahryman Serdarymyzyň tagallalary bilen häzirki döwürde ulag-kommunikasiýa toplumyny maksatnamalaýyn esasda ösdürmek, halk hojalyk ýükleriniň daşalmagyny kämilleşdirmek, ýolagçylary gatnatmak boýunça giň gerimli işler alnyp barylýar. Munuň özi ýurdumyzyň ykdysady kuwwatyny has-da ösdürmäge ýardam berýär. Toplumyň işini kämilleşdirmek maksady bilen, Türkmenistanyň Demir ýol ulaglary, Aragatnaşyk, Awtomobil ulaglary ministrlikleri, «Türkmenhowaýollary» döwlet gullugy hem-de Deňiz we derýa ulaglary döwlet gullugy döredildi. Türkmenistanyň Ýewraziýa we yklymüsti aragatnaşyk ýollarynyň strategik çatrygynda geografik taýdan amatly ýerleşişini göz öňünde tutup, ýurdumyzyň üstaşyr ulag, logistika mümkinçiliklerinden has netijeli peýdalanmaga gönükdirilen giň gerimli işler alnyp barylýar. Ulagyň ähli görnüşleri bilen ýolagçy we ýük dolanyşygyny ösdürmek, ýurdumyzyň halkara üstaşyr ulag mümkinçiligini doly ulanmak boýunça degişli işler amala aşyrylýar. Şu ýyl hormatly Prezidentimiziň gatnaşmagynda Balkanabat şäheriniň Jebel şäherçesinde täze Halkara howa menziliniň ulanmaga berilmegi möhüm waka boldy. Aragatnaşyk pudagy hem döwrüň talabyna görä yzygiderli döwrebaplaşdyrylýar. Baýramçylyk meýdançasyndan topluma degişli edara-kärhanalaryň işgärleri we bezelen awtoulag platformalary geçýärler.

Soňra Döwlet münberiniň öňünden milli ykdysadyýetimiziň binýatlyk pudagy bolan nebitgaz toplumynyň işgärleri we awtoulag platformalary geçýär. Türkmenistan energiýa serişdeleriniň ägirt uly gorlaryna eýe bolup, ýangyç-energetika toplumyny diwersifikasiýalaşdyrmak strategiýasyny durmuşa geçirýär. Şunda gazyp alýan, gaýtadan işleýän pudaklaryň kuwwatyny artdyrmaga, ýokary hilli önümleriň dürli görnüşlerini öndürýän innowasion önümçilikleri döretmäge, energiýa serişdelerini eksport etmek üçin köpugurly turbageçiriji infrastrukturany kemala getirmäge möhüm ähmiýet berilýär. Munuň özi netijeli halkara hyzmatdaşlyk üçin amatly mümkinçilikleri açýar. Bu ugurda ýurdumyzyň durmuşa geçirýän iri taslamalary sebit derejesinde umumy ösüşe itergi bermäge gönükdirilendir. Dünýäde iri uglewodorod ýataklarynyň biri bolan «Galkynyş» gaz känini tapgyrlaýyn esasda özleşdirmek işleri üstünlikli durmuşa geçirilýär. Şu ýyl «Türkmennebit» döwlet konserniniň Türkmenbaşydaky nebiti gaýtadan işleýän zawodlar toplumynyň “Kenar” toplaýjy-ýükleýji nebit kärhanasynyň nebit we nebit önümleri guýulýan 3-nji gämi duralgasy açylyp ulanmaga berildi.

Soňra meýdançadan maliýe we ykdysadyýet toplumyna wekilçilik edýän awtoulag platformalary geçdi. Şu ýyl berkarar döwletimiziň baş maliýe meýilnamasyndan bilimi, saglygy goraýşy, medeniýeti ösdürmäge, önümçilik we durmuş-medeni maksatly desgalaryň gurluşygyna köp möçberde serişdeler goýberildi. Watanymyzyň ykdysadyýeti durnukly ösýär. Milli ykdysadyýetimizi sanlylaşdyrmagyň çäklerinde ýurdumyzda bu pudagy döwrebaplaşdyrmak boýunça maksada gönükdirilen çäreler görülýär. Bank işine sanly tehnologiýalar ornaşdyrylýar, olaryň gerimi giňeldilýär, elektron töleg ulgamy kämilleşdirilýär we nagt däl hasaplaşyklaryň möçberi artdyrylýar. Ýakynda “Awaza” milli syýahatçylyk zolagynda geçirilen Türkmenistanyň maýa goýum forumy daşary ýurtly hyzmatdaşlar bilen ykdysady hyzmatdaşlygy pugtalandyrmak, täze işewürlik gatnaşyklaryny ýola goýmak babatda amatly mümkinçilikleri döretdi. «Türkmenistanyň zähmet bazaryny 2030-njy ýyla çenli ösdürmegiň Konsepsiýasy» bolsa täze, döwrebap iş orunlaryny döretmäge, ilatymyzyň iş üpjünçiligini has-da kämilleşdirmäge uly ýardam berer.

Oba hojalyk we azyk senagaty ulgamyna degişli pudaklaýyn düzümleriň baýramçylyk äheňinde bezelen awtoulaglary we işgärleri dabaraly ýörişi dowam edýärler. Azyk bolçulygyny pugtalandyrýan Türkmenistan ýylyň-ýylyna oba hojalyk önümleriniň öndürilýän möçberini artdyrýar, pudagyň infrastrukturasy kämilleşdirilýär, dünýäniň öňdebaryjy kompaniýalarynyň döwrebap tehnikalary we enjamlary yzygiderli satyn alynýar. Döredilýän amatly şertlerden ruhlanyp zähmet çekýän merdana daýhanlarymyz oba hojalyk ekinleriniň bol hasylyny ýetişdirip, ýurdumyzda azyk önümleriniň bolçulygyny döretmäge öz mynasyp goşantlaryny goşýarlar. Şu ýyl oba hojalyk işgärleri Watan harmanyna 1 million 400 müň tonnadan gowrak bugdaý hasylyny tabşyrdylar, 2 müň 100 tonnadan gowrak pile öndürdiler. Ýurdumyzyň daşky gurşawy goramak, suw hojalygy, maldarçylyk we guşçulyk senagaty, atçylyk pudaklary hem okgunly ösdürilýär. Ýer-suw serişdelerinden netijeli peýdalanmak, öňdebaryjy tehnologiýalary ornaşdyrmak, täze suw howdanlaryny gurmak boýunça maksada gönükdirilen çäreler durmuşa geçirilýär.

Dabara medeniýet ulgamynyň işgärleriniň ýörişi bilen jemlendi. Halkymyzyň ruhy gymmatlyklaryny, medeni mirasyny aýawly saklamakda, ony mundan beýläk-de ösdürmekde, dünýä ýaýmakda medeniýet ulgamyna uly orun degişlidir. Ruhy baýlyk bolan milli medeniýetiň we sungatyň ösdürilmegine, maddy-enjamlaýyn binýadynyň pugtalandyrylmagyna, döredijilik işgärleriniň ukyp-başarnyklaryny doly derejede açmaklary üçin şertleriň döredilmegine aýratyn üns berilýär. Hormatly Prezidentimiziň bimöçber goldaw-hemaýatlary bilen medeniýet, sungat, döredijilik işgärlerine hormatly atlar dakylyp, olar döwlet sylaglary bilen sylaglanylýar. Halkymyzyň milli gymmatlyklary tutuş dünýäde giňden wagyz edilýär we halkara jemgyýetçilik tarapyndan ykrar edilýär. Türkmen halkynyň sungatynyň hem-de senetçiliginiň birnäçe görnüşleriniň ÝUNESKO-nyň Adamzadyň maddy däl medeni mirasynyň sanawyna girizilmegi muňa aýdyň şaýatlyk edýär. Halkara parahatçylyk we ynanyşmak ýylynda medeni diplomatiýanyň üsti bilen halklaryň arasynda dost-doganlygy berkitmäge gönükdirilen halkara festiwallardyr beýleki çäreler geçirildi.

Diýarymyzyň bäş welaýatyna wekilçilik edýän aýdymçylaryň we tans toparlarynyň, ýaşajyk artistleriň çykyşlary Döwlet münberiniň öňündäki dabaralaryň ajaýyp jemlenmesine öwrüldi. Olar çykyşlarynda Watanymyzy, agzybir türkmen halkyny, Gahryman Arkadagymyzyň we Arkadagly Gahryman Serdarymyzyň beýik işlerini wasp etdiler.

Dabaranyň ahyrynda döwlet Baştutanymyzy Mejlisiň Başlygy, Ministrler Kabinetiniň Başlygynyň orunbasarlary, harby we hukuk goraýjy edaralaryň ýolbaşçylary, Aşgabat şäheriniň, ýurdumyzyň welaýatlarynyň häkimleri Türkmenistanyň Garaşsyzlygynyň şanly 34 ýyllygy bilen tüýs ýürekden gutladylar hem-de Arkadagly Gahryman Serdarymyza berk jan saglyk, uzak ömür, il-ýurt bähbitli işleriniň rowaçlyklara beslenmegini arzuw etdiler.

Hormatly Prezidentimiz hemmeleri mukaddes Garaşsyzlygymyzyň şanly senesi bilen gutlady we alyp barýan işlerinde üstünlikleri arzuw edip, bu ýerden ugrady.

Paýtagtymyzda badalga alan baýramçylyk dabaralary ýurdumyzyň ähli künjeklerinde dowam edip, ildeşlerimiziň kalbyny baýramçylyk şatlygy hem-de buýsanç duýgulary bilen doldurdy. Watanymyzyň Garaşsyzlygynyň 34 ýyllygy mynasybetli dabaralar agşam “Älem” medeni-dynç alyş merkeziniň öňündäki meýdançada geçirilen konsert bilen dowam etdi. Bu ýere ýygnanan köp sanly tomaşaçylaryň öňünde meşhur hem-de ýaş artistler, folklor-tans toparlary öz ussatlyklaryny görkezdiler. Baýramçylyk feýerwerki Garaşsyzlyk baýramyna bagyşlanan dabaralaryň özboluşly jemlenmesine öwrülip, Aşgabadyň gijeki asmanyna ajaýyp baýramçylyk öwüşginini çaýdy.

Türkmenistanyň Döwlet habarlar agentligi